GERURITAN I KOCONG MAJU PILKADA : hayooook.......belajar mageguritan....

ampura, kantun ngabagin niki: mangde malih semangat mageguritan...mangde wenten anggen pakandel manah. yening iwang ampurayang, titiang wau malajah puniki
katur; raris cawisang

GERURITAN I KOCONG MAJU PILKADA
GURITAN KAPARTAMA
Olih cok sawitri

DURMA
gumi wayah keneh buduh manyinahang
I kocong nyalonang diri
sai-sai  masuluh mameka
bala ngelah pipis membah
I kocong mangetek kanti
marasa menang
ngantungang blakas matali

timpal tuak calegak  cleguk nyaratang
mai jani tangkil ka partai
matur kwangen sasembahan
mapan keto kasiur orta
amun kar nyalonang diri
lagasang mayah
mula maal hargan korsi

I kocong kedek katudun masemita
nelektang sane mamunyi
I Nyamprut kasub madaya
bilang pemilu matanja
ngaku liu ngelah pamilih
alah sodagar
amun cocok kude bani

dayane  Nyamprut suba makejang nawang
munyi manis buin mandi
tosing takut yan getarang
liu gati ngelah jawaban
dapin mayah kar kalilih
mula inan celang
bilang menang kaakuin

matur nyunyur sambilang makakedekan
I Nyamprut ngaraos manis
kudang rupiah kar bayahang
bli mangde mapawilangan
uli neken administrasi
ngumpulang massa
bilang song  nagiang pipis

I Nyamprut mahbahang politik pilkada
yen pusat anggon pamargi
gampang susah mapaitungan
asan inggas acepokan
nanging beten lakar ketil
makejang layah
sing barenin lakar brangti

Yan mamilih pamargine cenik lantang
uli beten dalit pipis
alah mikat anak bajang
apang boh matua sayangang
tosing ade ngaremikin
nang bli ngitungang
sing dikori manyelselin

GINADA
I kocong kenyemne jengah
suba mebo dayan dungkil
i Nyamprut bungutne makuah
angob mase nu kagugu
suba samah anak punyah
kena dalit
nugtugin dayan ane corah

nang  bahbahang teken icang
dija tongosne kantin cai
apang melah icang

mayah
apang tusing masang bubu
tukad ngetuh ape amah
care jani
timpal seken mase lawan

I kocong silib manantang
ane suba kaketekin
dajan pangkung dauh tukad
watek soroh suba suluh
gria puri dadia pura
alah lidi
anggo ikat keneh melah

ane suba kajalanang
bli tangar ken dayan cai
cai ngarit mase ngabas
nyemak pipis dini ditu
ane menang kasuryakang
ne kalilih
karaosang mayah kuang

apang sumeken nawang
bli maju ulian nurani
suba tegep duang tiban
bli sayaga lakar maju
wiadin kalah lakar tohang
sing mapipis
nirdon menang dipayudan

DEMUNG
I nyamprut makeliab masahut bangras
dados  lagas nungi-nungi
apang galang teken sulur
tiang ne anggota partai
kapala cabang nto ipah
ajak sai medem bangun
ape raos keto oraang
amun bogbog sander tatit
ne melah-melah kanehang
de malu masolah kaku

Buin I nyamprut jantur ngaraos napnap
kudang gubernur bupati
nang sambatang keras aukud
bidang kauh bidang kangin
ade suba ngaremonang
kalah ulian kena uluk
I nyamprut bani masumpah
ngacorang didalem puri
melahang bli nganikaang
apa tusing biut malu

Matur adeng halus mata kalem galak
mula pakembar sujati
suba mumbi nguluk-uluk
patuakane jani sepi
I nyamprut ngalegar sanga
nyangih tiuk uli hulu
mai jani mapitungan
nyongklak dayan reformasi
ne pantes ento entungang
ulian jujur tosing payu

Nang jejerang ane madan wakil rakyat
apa saje nawang politik
maan pangkat ulian guyu
ne cen masekeha partai
ne rajin nekot atasan
dadi panjak dueg ngajum
ento madan loyalitas
maan gelar politisi
elah maju maan pangkat
apan ento ne kagugu

Yen meled ngarebutang pangkat pilkada
ane  makelas bupati
pipis menang gede bayu
dueg ngalemuhang ati
konden nagih apang maang
alahan ken punyan kayu
menek tuun anak wayah
mun gerit matoh nurani
pingkel-pingkel nyan i dongkang
‘to jabatan sing paunduk

Selediang makejang para manggala
Sajan ke ngadut nurani
Makejang magandong bubu
Ane lepet juk pulisi
Amun aget makapangan
Manakang pipis seket siu
Panak korsi ‘to milyaran
De matimbang beneh pelih
Jani patuh jak makejang
Patuh daya patuh saru

I nyamprut ngaprusang tuakne manantang
mun bli ngawala nurani
Tiang lagas mahang pur
Montor tiang pijer bukti
Petoh tiang yan bli menang
I koncong tangkahne siur
Petuakanne telah tegak
Makejang pade manganti
Alahan siap kakembar
I koncong wales mangadu

(JAGI KALANTURANG…..MALIH PIDAN MINAB)