Ampura, niki wau malajah, dumadak membah malih ngurit ngarupak ring jagate, becik malih ring fisbuke....mangde sekadi gaya siaran radio niki; raris cawisang
MALAJAH PADALINGSA; PUPUH SINOM (WATEKAN) SEMUT
kasurat olih Cok sawitri
nutug pajalan sumangah
tendas kembung kulit ngendih
Sliwar sliwer joh ken tanah
Jeg ngatitem mamedihin
apan mrasa banya tinggi
semut agung tendas kembung
buntut gemol ceking bancang
deratdat derutdut banggi
alah guyu
nanging tosing tepuk gumi
nang ke sidem sambatang
awak selem kulit lanyig
tendas cenik panyuh celang
akecritan mata pedih
kucekang kang nyumingkin
merem gandem pala ngadu
ngae taluh bilang dangka
sulur sidem mule cungkling
saget nyaru
nden tatas ba ngariamin
samaluh ngagelar solah
awak gede ngajejehin
mapimapi dadi sumangah
tosing belur yan nyingetin
pragat solah ngaranyik
gaya jamprah landa lundu
belog conol tiwas lekad
kaplag kaplugang joh kori
tosing tahu
I jelajag manyurakin
paling jelajag matindak
pati kaplug uyang paling
bes kaliwat ngamah gula
tosing nawu rasa lepis
punyahe ulian manis
wadih kanti srayang sruyung
bayu pusang kerem gula
gobane lemlem ngadingkling
raris nudut
Ngariamin awak padidi
Nang I bekis takonang
suba cenik keneh bengis
demen sajan ngadad-adag
nyenget ngipuk ngagenitin
gibel-gibel medihin
I bekis masolah lugu
buyar yar palaibe samprag
demen nimpung getih mati
alah alu
getarang ngaliwes ilib
Yan patapaan I rangrang
batis sengkok kumis muing
awak gede mula gagah
kulit selem caling renggah
di padange manyelisik
tepuk timpal kaden satru
alahang jangkrik kapluggang
demen saje matimpal mati
nyama adu
tepuk cepok ngepet pati
semut api bablakasan
nyander salap alah angin
cegut kulit kebyahkebyah
sliabsliab kembung api
calinge maguna gni
awak kieng ditanah manyaru
matambus sai mapanggang
ulian cenik meled sakti
umah abu
kaasihin sih olih api
(batubulan naweg purnamane)
No comments:
Post a Comment